Xalq deputatlari Vobkent tumani Kengashi deputati Dilorom Qodirova tomonidan Vobkent tumanidagi Paxtakor oilaviy shifokorlik punktida aholiga koʻrsatilayotgan tibbiy xizmat sifati, bemorlar uchun yaratilgan sharoitlar hamda bepul berilishi belgilangan dori-darmon vositalarining mavjudligi va aholiga yetkazib berilish holati oʻrganildi.

🔍Oʻrganish davomida shifokorlik punktida murojaat qilayotgan fuqarolar bilan suhbatlar oʻtkazilib, ularning tibbiy xizmatlardan foydalanish jarayonidagi fikr va takliflari tinglandi. Shuningdek, tibbiyot xodimlari tomonidan aholiga koʻrsatilayotgan birlamchi tibbiy yordam sifati, navbatlar tizimi, dori vositalarining saqlanish sharoiti hamda sanitariya-gigiyena talablariga rioya etilishiga alohida eʼtibor qaratildi.

💋Mazkur oʻrganish jarayonida ayrim yoʻnalishlarda mavjud muammolar va kamchiliklar yuzasidan masʼullarga tegishli tavsiya hamda koʻrsatmalar berildi. Taʼkidlanganidek, aholining salomatligini mustahkamlash, ularga sifatli va zamonaviy tibbiy xizmat koʻrsatish, ayniqsa ehtiyojmand fuqarolarni bepul dori-darmon bilan taʼminlash masalalari doimiy deputatlik nazoratida boʻlib qoladi.

🚑Shuningdek, shifokorlik punkti faoliyatini yanada yaxshilash, aholiga qulaylik yaratish hamda tibbiy xizmatlar samaradorligini oshirish borasidagi ishlarni izchil davom ettirish lozimligi qayd etildi.