️Bugungi kunda aholini, ayniqsa, xotin-qizlarni doimiy ish o‘rinlari bilan ta’minlash davlat siyosatining eng muhim yo‘nalishlaridan biri hisoblanadi. Bu borada hududlarda amalga oshirilayotgan ishlar xalq vakillarining doimiy e’tiborida bo‘lib kelmoqda.

Xalq deputatlari Jondor tumani Kengashi raisi L.Behbudova tuman markazida yangidan faoliyat boshlagan "TT MALL" Xitoy savdo majmuasida bo‘ldi. Majmua ish boshlashi natijasida 56 nafar mahalliy xotin-qizlar doimiy ish bilan ta’minlanganligi, ishchilar uchun zamonaviy mehnat sharoitlari yaratilganlik holati, aholi uchun keng turdagi mahsulotlar va qulay xizmat ko‘rsatish tizimi yo‘lga qo‘yilganligini o‘rgandi.

Tashrif davomida Kengash raisi yangi ish boshlagan xotin-qizlar bilan suhbatlashib, ularning mehnat sharoitlari, ish haqi va yaratilgan qulayliklar bilan yaqindan tanishdi. Tadbirkorlik subyektlarini qo‘llab-quvvatlash orqali yangi ish o‘rinlarini ko‘paytirish tuman iqtisodiyoti va ijtimoiy muhitiga ijobiy ta’sir ko‘rsatishi ta’kidlandi.

"Maqsadimiz — har bir xotin-qizning o‘z daromadiga ega bo‘lishi va oilasi farovonligiga hissa qo‘shishi uchun sharoit yaratishdir. Bunday zamonaviy majmualar nafaqat xizmat ko‘rsatish sifatini oshiradi, balki ishsizlikni kamaytirishda katta ahamiyatga ega", — dedi L.Behbudova.

Bu kabi loyihalar Jondor tumanida aholi turmush darajasini yuksaltirish yo‘lidagi muhim qadamlardan biridir.