18-Hazortut saylov okrugi deputati M.Jumayeva tomonidan Qumrabot mahalla fuqarolar yig’inida xotin-qizlarni kasbga yo’naltirish, ularning bandligini ta’minlash hamda doimiy daromad manbaini yaratish borasida amalga oshirilayotgan ishlar o’rganildi.

O’rganish jarayonida mahalladagi ishsiz va ijtimoiy qo’llab-quvvatlashga muhtoj xotin-qizlarni kasb-hunarga o’qitish, tikuvchilik, pazandachilik, hunarmandchilik kabi yo’nalishlarga jalb qilish bo’yicha amalga oshirilayotgan ishlar bilan yaqindan tanishildi. Shuningdek, kasb o’rgangan xotin-qizlarning bandligini ta’minlash, ularni oilaviy tadbirkorlikka yo’naltirish hamda o’zini o’zi band qilish imkoniyatlarini kengaytirish masalalari muhokama qilindi.

Deputat mahallada tikuvchilik faoliyati bilan shug’ullanib kelayotgan xotin-qizlar xonadonlarida ham bo’lib, ular uchun yaratilgan sharoitlar, tikuv mashinalari va tayyorlanayotgan mahsulotlar bilan tanishdi. Ayniqsa, uy sharoitida mehnat qilib, oila daromadini oshirayotgan, qo’shimcha ish o’rinlari yaratishga hissa qo’shayotgan xotin-qizlarning faoliyatiga ijobiy baho berildi. Tikuvchilik orqali xotin-qizlarning iqtisodiy faolligini oshirish, ularning tadbirkorlikka qiziqishini kuchaytirish muhim ahamiyat kasb etishi ta’kidlandi.