Xalq deputatlari Qo‘qon shahar Kengashi deputati N.Shomatov tomonidan "O‘rmonbog‘" mahalla fuqarolar yig‘inida yoshlar yetakchisi Raximova Kamolaxonning faoliyati yuzasidan o‘rganish ishlari olib borildi.

O‘rganish davomida mahallada yoshlar bilan olib borilayotgan ishlar, ularning bandligini ta’minlash, ta’limga jalb etish hamda davlat yoshlar siyosati doirasida amalga oshirilayotgan chora-tadbirlar tahlil qilindi.

Ma’lum qilinishicha, mahalla hududida 639 nafar yoshlar istiqomat qiladi. Hozirgi kunda ular orasida 4 nafar ishsiz yosh mavjud bo‘lib, ularning bandligini ta’minlash yuzasidan manzilli ishlar olib borilmoqda.

Shuningdek, joriy yilda 18 nafar bitiruvchi umumiy o‘rta ta’lim muassasasini tamomlagan bo‘lib, ularning barchasi oliy ta’lim muassasalariga o‘qishga kirishga yo‘naltirilganligi qayd etildi.

Bundan tashqari, hisobot davrida 20 nafar yosh mehnat bozoriga kirib kelgani, ularni doimiy ish bilan ta’minlash va kasb-hunarga yo‘naltirish bo‘yicha tizimli ishlar amalga oshirilayotgani ta’kidlandi.

Xalq deputatlari Qo‘qon shahar Kengashi