Rayon hákimi hám deputat mektepke taza ishimlik suwın tartıw joybarların kórip shıqtı

⚡️ Shımbay rayon hákimi N.Eshanov hám rayonlıq Keńes sekretariatı baslıǵı M.Zarikeev tárepinen “Qosterek” máhállesindegi 35-sanlı ulıwma bilim beriw mektebinde oqıwshılar ushın qolaylı hám sanitariyalıq-gigienalıq talaplarǵa juwap beretuǵın sharayatlardı jaratıw, atap aytqanda, mektep imaratına taza ishimlik suwı tarmaǵın tartıw boyınsha ámelge asırılıwı rejelestirilip atırǵan joybarlar úyrenip shıǵıldı.

Úyreniw dawamında mekteptiń bar ishimlik suwı támiynatınıń jaǵdayı, suw tarmaǵın tartıw imkaniyatları, zárúr infrastruktura hám texnikalıq sheshimler kórip shıǵıldı. Sonday-aq, joybardı ámelge asırıw ushın zárúr bolatuǵın jumıs kólemi, qarjı hám texnikalıq imkaniyatlar boyınsha juwapkerler menen pikir alısıldı.

Bul joybardı ámelge asırıw arqalı mektepte bilim alıp atırǵan oqıwshılar hám pedagog xızmetkerlerdi sapalı hám taza ishimlik suwı menen támiyinlew, sanitariyalıq sharayatlardı jáne de jaqsılaw názerde tutılmaqta.

Úyreniw juwmaǵında anıqlanǵan máselelerdi basqıshpa-basqısh sheshiw, joybardı ámelge asırıw boyınsha tiyisli ilajlardı kóriw jáne jumıslardıń sapalı hám belgilengen múddetlerde orınlanıwın támiyinlew boyınsha juwapkerlerge tiyisli usınıslar berildi.