Aholining huquqiy savodxonligini oshirish, fuqarolarning qonuniy huquq va manfaatlarini himoya qilish hamda fuqarolik jamiyati institutlari bilan hamkorlikni rivojlantirish deputatlik nazoratining muhim yo‘nalishlaridan biridir.

Shu maqsadda Xalq deputatlari Termiz shahar Kengashi raisi, deputat D.Normurodova, Kengash kotibiyati mudiri, deputat A.Ashurov hamda kotibiyat bosh mutaxassisi R.Mamashukurov “Madad” nodavlat notijorat tashkilotining Termiz shahar huquqiy maslahat byurosiga tashrif buyurib, muassasa faoliyati va fuqarolarga ko‘rsatilayotgan huquqiy yordam xizmatlari bilan tanishdilar.
O‘rganish O‘zbekiston Respublikasining 1999-yil 14-apreldagi 763-I-sonli “Nodavlat notijorat tashkilotlari to‘g‘risida”gi Qonuni talablarining ijrosini tahlil qilish bilan bog‘liq savolnoma asosida tashkil etildi.

Jarayonda mazkur Qonun doirasida nodavlat notijorat tashkilotlari faoliyatini qo‘llab-quvvatlash, ularning huquqlari va qonuniy manfaatlarini ta’minlash, davlat organlari hamda boshqa fuqarolik jamiyati institutlari bilan hamkorligini rivojlantirish masalalariga e’tibor qaratildi.

Shuningdek, “Madad” NNT tomonidan aholiga, xususan, ijtimoiy himoyaga muhtoj fuqarolarga bepul huquqiy maslahatlar berish, ularning huquqiy muammolarini hal etishga ko‘maklashish, fuqarolarning murojaatlarini ko‘rib chiqish hamda huquqiy savodxonligini oshirish borasidagi ishlar tahlil qilindi.

O‘rganish davomida nodavlat notijorat tashkilotlarining ijtimoiy ahamiyatga ega loyihalardagi ishtiroki, davlat organlari va mahalla institutlari bilan hamkorligi, fuqarolik tashabbuslarini qo‘llab-quvvatlash, jamoatchilik nazoratini rivojlantirish hamda aholining huquqiy ongi va huquqiy madaniyatini yuksaltirishga qaratilgan faoliyat masalalari ham ko‘rib chiqildi.

Bundan tashqari, tashkilot faoliyatining ochiqligi va hisobdorligini ta’minlash, davlat mablag‘laridan samarali foydalanish, korrupsiyaviy holatlarning oldini olish, zamonaviy axborot texnologiyalarini joriy etish hamda xizmatlar sifatini oshirishga oid masalalar yuzasidan tahlil olib borildi.

Hamkorlik — huquqiy himoyani kuchaytirish omili

Tashrif yakunida Xalq deputatlari Termiz shahar Kengashi va “Madad” nodavlat notijorat tashkiloti o‘rtasidagi hamkorlikni yanada mustahkamlash, deputatlik o‘rganishlari davomida aniqlanadigan huquqiy muammolarni tegishli tartibda hal etish, fuqarolarning murojaatlari bilan ishlash samaradorligini oshirish hamda aholiga huquqiy yordam ko‘rsatish imkoniyatlarini kengaytirish masalalari muhokama qilindi.

O‘rganish natijalari asosida mavjud muammolar va takliflarni umumlashtirish, nodavlat notijorat tashkilotlari faoliyatini rivojlantirish hamda qonunchilik talablarining ijrosini ta’minlashga qaratilgan chora-tadbirlarni takomillashtirish nazarda tutilgan.

Zero, fuqarolarning qonuniy huquq va manfaatlarini himoya qilish, aholining huquqiy savodxonligini oshirish va fuqarolik jamiyati institutlari bilan samarali hamkorlikni yo‘lga qo‘yish — deputatlik faoliyatining ustuvor vazifalaridan biridir.