#24_ta_masala
Oliy Majlis Senatining Mudofaa va xavfsizlik masalalari qo‘mitasi raisi o‘rinbosari Abdullayev Baxrom Ismoilovich, Xalq deputatlari Nurobod tumani Kengashi deputati S.Suyarov hamda tuman Kengashi kotibiyati mudiri B.Oblanov bilan birgalikda hududda amalga oshirilayotgan ijtimoiy-iqtisodiy dasturlar ijrosi, belgilangan vazifalarning bajarilishi hamda istiqboldagi rejalar bilan tanishdi.

Tashrif davomida tuman sog‘liqni saqlash bo‘limi tasarrufida yangidan qurilayotgan tug‘ruq majmuasida olib borilayotgan qurilish ishlari ko‘zdan kechirildi.

O‘rganish jarayonida qurilish ishlarining borishi, obyektning belgilangan loyiha talablari asosida barpo etilishi, yaratilayotgan shart-sharoitlar hamda majmuani zamonaviy tibbiy infratuzilma bilan ta’minlash masalalariga e’tibor qaratildi. Shuningdek, kelgusida muassasada onalar va chaqaloqlarga malakali tibbiy yordam ko‘rsatish uchun zarur sharoitlarni yaratish, tibbiy xizmat sifatini oshirish va mavjud imkoniyatlarni kengaytirish yuzasidan fikr almashildi.

Yangi tug‘ruq majmuasining barpo etilishi tumanda onalik va bolalikni muhofaza qilish, homilador ayollar hamda chaqaloqlarga ko‘rsatiladigan tibbiy xizmatlar sifatini yaxshilash, shuningdek, aholiga qulay va zamonaviy tibbiy xizmat ko‘rsatish imkoniyatlarini kengaytirishda muhim ahamiyat kasb etadi.

Tashrif davomida mas’ullar bilan qurilish ishlarining sifatli bajarilishi, belgilangan vazifalarning o‘z vaqtida amalga oshirilishi hamda kelgusida majmuadan samarali foydalanishni ta’minlash masalalari muhokama qilindi.

Aholi salomatligini muhofaza qilish, tibbiyot muassasalarining moddiy-texnik bazasini mustahkamlash va tibbiy xizmat ko‘rsatish sifatini yanada oshirishga qaratilgan ishlar hududni ijtimoiy rivojlantirishning muhim yo‘nalishlaridan biri hisoblanadi.