Xalq deputatlari G‘ozg‘on shahar Kengashi deputati A.Aminov hamda shahar IIB boshlig‘i Z.Shamshiddinov bilan hamkorlikda shaharda jinoyatchilikning oldini olishga qaratilgan ishlar o‘rganildi.

O‘rganish davomida hududlarda huquqbuzarlik va jinoyatchilikning oldini olish, jamoat tartibini saqlash, profilaktik tadbirlarni kuchaytirish hamda fuqarolar xavfsizligini ta’minlash borasida amalga oshirilayotgan ishlar tahlil qilindi.

Shuningdek, shahardagi jamoat joylari, ko‘chalar va aholi gavjum hududlarda o‘rnatilgan kuzatuv kameralari mavjudligi, ularning ishlash holati, hududlar kesimida qamrov darajasi hamda xavfsizlikni ta’minlashdagi ahamiyati ham o‘rganildi.

Mazkur yo‘nalishda kuzatuv kameralaridan samarali foydalanish, jinoyat va huquqbuzarliklarning oldini olish, tezkor nazoratni kuchaytirish hamda fuqarolar osoyishtaligini ta’minlash bo‘yicha ishlarni yanada jadallashtirish zarurligi ta’kidlandi.

O‘rganish yakunida profilaktik tadbirlarni kuchaytirish va xavfsizlik infratuzilmasini yanada mustahkamlash yuzasidan tegishli tavsiyalar berildi.