Xalq deputatlari tuman Kengashi deputati O‘rol Cho‘tboev tashabbusi bilan tumandagi “Tolli” va “Shakarko‘l” mahallalarida ko‘chalarga biriktirilgan ko‘cha boshilari ishtirokida davra suhbati tashkil etildi. 

     Uchrashuvdan ko‘zlangan asosiy maqsad mahallalarda obodonlashtirish ishlarini tizimli ravishda yo‘lga qo‘yish, mavjud muammolarni aniqlash hamda ularni hamkorlik asosida bartaraf etishdan iborat bo‘ldi. 

     Davra suhbati davomida hududlarni yanada obod va ko‘rkam qilish, eski uy-joylarni ta’mirlash, ichimlik suvi ta’minotini yaxshilash, mavjud suv tarmoqlarini tartibga keltirish masalalari atroflicha muhokama qilindi. Shuningdek, tomorqalardan unumli foydalanish, aholi bandligini oshirish, bog‘dorchilik va dehqonchilikni rivojlantirish bo‘yicha taklif va mulohazalar bildirildi. 

    Bu borada nuroniylarning hayotiy tajribasi va amaliy tavsiyalaridan keng foydalanish, yosh avlodga o‘rnak bo‘ladigan tashabbuslarni qo‘llab-quvvatlash zarurligi alohida ta’kidlandi. 

    Suhbat yakunida obodonlashtirish masalalari yuzasidan aholi bilan muntazam uchrashuvlar o‘tkazish, muhokama guruhlarini tashkil etish, nuroniylardan iborat ishchi va maslahat guruhlarini shakllantirish bo‘yicha kelishuvga erishildi. Shuningdek, amalga oshirilayotgan ishlar va ularning natijalari haqida aholiga doimiy ravishda ochiq va shaffof ma’lumot berib borish muhimligi qayd etildi. 

    Mazkur uchrashuv mahallalarda hamjihatlikni mustahkamlash, hududlarni obod va farovon maskanga aylantirish yo‘lida muhim qadam bo‘ldi.