Xalq deputatlari Xorazm viloyat Kengashiga 18-Yuqoribogʻ saylov okrugidan saylangan deputat G.Kurbanbayeva Urganch tumani “Uyshin” mahallasidagi saylovchilar bilan uchrashuv oʻtkazdi. Uchrashuvda aholi gaz balonlari yetarlicha berilmayotganligi, aholi uylaridan chiqindi chiqmasa ham pul talab qilinayotganligidan norozi ekanligini bayon qildi. 

Shuningdek, pensiya puli kam chiqqanligi, sogʻligini tiklash va moddiy yordam masalalarida murojaatlar kelib tushdi. 

Bundan tashqari 29-sonli oilaviy poliklinika filialida laboratoriya boʻlimini ochib berish soʻraldi. Chunki shu hududda 11 mingdan ziyod aholi yashaydi va ular birlamchi tibbiy koʻrikdan oʻtish uchun uzoq masofaga borishlarini bildirishdi.

Yuqoridagi masalalar deputat tomonidan oʻrganib chiqildi va joyida hal qilinmagan murojaatlar boʻyicha tegishli tashkilotlarga deputat soʻrovi yuborilib, nazoratga olindi.

Saylovchilar bilan bunday uchrashuvlar oʻtkazilishi davom ettiriladi.