Yangi maktab qurilishi bilan tanishildi

Xalq deputatlari Termiz tuman Kengashi 12-Soliobod saylov okrugi deputati Z. Achildiyev hamda tuman Kengashi mutaxassisi T. Murodov bilan birgalikda Soliobod mahallasida amalga oshirilayotgan yangi umumta’lim maktabi qurilishi ishlari joyiga chiqqan holda o‘rganildi.

O‘rganish davomida Soliobod mahallasidagi 6-sonli maktabning 120 o‘rinli eski, ta’mirtalab o‘quv binosi o‘rnida zamonaviy talablar asosida 660 o‘rinli yangi o‘quv binosi barpo etilayotgani bilan tanishildi. Qurilish ishlari sifati, belgilangan loyiha asosida olib borilayotgan jarayon hamda obyektning foydalanishga topshirilish muddatlari yuzasidan mas’ullar bilan fikr almashildi.

Shuningdek, yangi maktab foydalanishga topshirilgach, o‘quvchilar uchun zamonaviy va qulay ta’lim muhiti yaratilishi, ta’lim sifatini yanada oshirish hamda hududdagi maktablarga bo‘lgan ehtiyojni qoplashga xizmat qilishi ta’kidlandi. Qurilish ishlarining borishi deputatlik nazorati doirasida muntazam monitoring qilib borilishi qayd etildi.