Xalq deputatlari Muzrabot tumani Kengashining 2-«Obod turmush» saylov okrugidan saylangan deputat Xolmo‘minov Ikrom tuman Kengashi kotibiyati bosh mutaxassisi Sh.Shoymardanov bilan hamkorlikda «Obod turmush» mahalla fuqarolar yig‘inida navbatdagi ko‘chama-ko‘cha o‘rganish tadbirlarini amalga oshirdi.

Mazkur o‘rganishlardan ko‘zlangan asosiy maqsad – fuqarolar bilan bevosita muloqot qilish, ularni qiynayotgan muammolarni joyiga chiqqan holda o‘rganish, aholi turmush darajasi, mahalladagi ijtimoiy muhit, infratuzilma holati hamda mavjud kamchiliklarni aniqlash va ularni bartaraf etish yuzasidan amaliy choralar ko‘rishdan iborat bo‘ldi.

Shuningdek, aholi tomonidan bildirilgan murojaat va takliflar atroflicha o‘rganilib, ularni hal etish mexanizmlari muhokama qilindi. Ayrim masalalar yuzasidan fuqarolarga huquqiy tushuntirishlar berildi, mutasaddi tashkilotlar vakillari bilan hamkorlikda ijrosini ta’minlash bo‘yicha tegishli vazifalar belgilab olindi.

Ko‘chama-ko‘cha o‘rganish yakunida aniqlangan barcha muammolar deputatning maxsus o‘rganish jurnaliga qayd etildi. Har bir murojaat yuzasidan mas’ul idora va tashkilotlarga tegishli topshiriqlar berish, ularning ijrosini deputatlik nazorati asosida monitoring qilib borish hamda fuqarolarni qanoatlantiradigan yechimga erishish yuzasidan aniq chora-tadbirlar belgilandi.