Xalq deputatlari Muzrabot tumani Kengashi kotibiyati mudiri Sherboyev Dilmurod tuman Kengashi kotibiyati bosh mutaxassisi B.Xoliqov birgalikda Xalq deputatlari Muzrabot tumani Kengashi deputati Norqobilov G‘ayrat Ravshanovich saylangan 25-"Paxtakor" saylov okrugiga qarashli "Mehrigiyox" mahallasida navbatdagi ko‘chama-ko‘cha aylanib o‘rganish tadbirlarini amalga oshirdi.

O‘rganish davomida mahalladagi 12 ta ko‘chaning har birida istiqomat qilayotgan fuqarolar xonadonlariga tashrif buyurilib, aholi bilan ochiq muloqot qilindi. Suhbatlar davomida fuqarolarni qiynayotgan masalalar tinglanib, ularning taklif va murojaatlari o‘rganildi.

Mazkur o‘rganish mahalliy Kengash deputatlari faoliyatining 24 ta ustuvor yo‘nalishi asosida tashkil etildi. Unda aholining bandligi, tomorqalardan samarali foydalanish, ijtimoiy himoyaga muhtoj oilalarning yashash sharoiti, ichimlik suvi va elektr ta’minoti, kommunal xizmatlar sifati, ichki yo‘llarning holati, obodonlashtirish ishlari hamda hududda amalga oshirilayotgan bunyodkorlik ishlari batafsil ko‘zdan kechirildi.

Aniqlangan barcha muammolar deputatning maxsus nazorat jurnaliga qayd etilib, ularni bartaraf etish bo‘yicha tegishli mutasaddi tashkilotlar bilan hamkorlikda amaliy choralar ko‘rish yuzasidan vazifalar belgilandi. O‘rganish davomida ko‘tarilgan har bir masala deputatlik nazoratiga olinib, ularning ijrosi muntazam monitoring qilib borilishi ta’kidlandi.