Xalıq deputatları Bozataw rayonlıq Keńesi, sekretariatı baslıǵı, 1-“Palwash ataw” saylaw okrugi (MTDP) saylanǵan deputat A.Ibragimov tárepinen óz saylaw okrugi aymaǵında puqaralar menen ushırasıwlar hám múrájatlar úyreniw dawamında elat ishindegi infrastruktura obektleriniń jaǵdayı kózden ótkerildi.
Úyreniw barısında “A.Uteniyazov” hám “Doslıq” kósheleri kesilispesindegi jol bóleginde jaylasqan suw tarmaǵına tiyisli qudıqtıń (kolodec) aynalası buzılǵanlıǵı, beton qaplamasınıń sınıw sebepli qáwipsiz emes jaǵdayǵa kelgenligi anıqlandı.
Anıqlanǵan kemshilikti qısqa múddet ishinde saplastırıw hám obektti qáwipsizlik talaplarına sáykes túrge keltiriw maqsetinde "Qaraqalpaq suw támiynatı" JSHJ Bozataw rayonlıq filialına deputatlıq soraw jiberiw belgilenip, másele deputatlıq baqlawǵa alındı.
Deputatlıq xızmettiń tiykarǵı maqseti — puqaralar ushın qolay hám qáwipsiz infrastrukturalıq ortalıqtı qáliplestiriw, sonday-aq, xalqımızdıń kúndelikli turmısında ushırasatın máselelerdi óz waqtında anıqlap, olardıń sheshimine járdemlesiwden ibarat.