Murojaatda ko‘p qavatli uylarda issiqlik ta’minoti talab darajasida ishlamayotgani, issiq suv haroratining pastligi, ichki isitish tarmoqlaridagi texnik nosozliklar sababli aholiga noqulayliklar tug‘dirayotgani qayd etildi. Shuningdek, sovuq kunlarda xonadonlar yetarli darajada isinmasligi va issiq suv kelishi uchun jo‘mrakni uzoq vaqt ochiq holda ushlab turishga to‘g‘ri kelayotgani natijasida ortiqcha suv sarfi hamda qo‘shimcha xarajatlar yuzaga kelayotgani ta’kidlandi.

Deputat A. Xusayinov murojaatni tegishli tartibda ro‘yxatga olib, mas’ul tashkilotlar va sohaviy mutaxassislar bilan birgalikda holatni joyiga chiqqan holda o‘rgandi. O‘rganish davomida ko‘p qavatli uylardagi issiqlik ta’minoti, issiq suv tizimi va muhandislik kommunikatsiyalarida qator texnik kamchiliklar mavjudligi aniqlandi.

🔽Xususan, ayrim uylarning yerto‘lalaridan o‘tgan ichimlik suvi tarmoqlari noqonuniy ravishda kanalizatsiya tizimiga ulanib qolgani ma’lum bo‘ldi. Mazkur holat sanitariya-epidemiologik jihatdan fuqarolar salomatligi uchun jiddiy xavf tug‘dirishi qayd etildi hamda aholi salomatligi har doim ustuvor masala ekani alohida ta’kidlandi.

➡️O‘rganish yakunida Al-Xorazmiy MFY hududidagi mavjud muammolarni bartaraf etish, suv ta’minoti tizimidagi kamchiliklarni qisqa muddatlarda hal etish hamda tegishli tashkilotlar bilan hamkorlikda amaliy choralar ko‘rish bo‘yicha mas’ullarga tegishli topshiriqlar berildi.