Xalq deputatlari Zarbdor tuman Kengashi qarori bilan hududlarda 400 nafar yoshlar uchun ajratilgan qishloq xo‘jaligi yer maydonlarini sug‘orish tizimi bilan ta’minlash maqsadida quduq qazish ishlari uchun 2 milliard so‘m mablag‘ ajratildi.

Mazkur qaror ijrosi shu kunning o‘zida nazoratga olinib, Xalq deputatlari Zarbdor tuman Kengashining Mahalliy budjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiyasi raisi, deputat T.Qodirov tomonidan hududlarga chiqqan holda o‘rganildi.

O‘rganish davomida yoshlarga ajratilgan yer maydonlarida artezian quduqlar qazish, sug‘orish tizimini yaxshilash hamda suv nasoslarini o‘rnatish bo‘yicha amalga oshirilayotgan ishlar ko‘zdan kechirildi.

Mazkur tashabbus yoshlarning bandligini ta’minlash, ularni dehqonchilik va tadbirkorlik faoliyatiga keng jalb etish hamda yer maydonlaridan samarali foydalanishga xizmat qilmoqda.