“HOTIRA BOR EKAN – MILLAT BARHAYOT”

9-may — yurtimizda Xotira va qadrlash kuni sifatida keng nishonlanadigan ulug‘ sana hisoblanadi. Bu kun Vatan ozodligi va tinchligi yo‘lida jonini fido qilgan ajdodlarimiz xotirasini yod etish, ularning jasorati va matonatini e’zozlashga bag‘ishlanadi.

Mazkur sana munosabati bilan “Xotira bor ekan – millat barhayot” mavzusida ma’rifat tadbiri tashkil etildi. Tadbirda Navoiy shahar hokimi, Xalq deputatlari Navoiy shahar Kengashi deputati Ergashev Dilmurod Bekmuradovich ishtirok etdi.

Ma’rifat tadbiri davomida xotira va qadrlash tushunchasining ma’naviy ahamiyati, ajdodlarimizning boy merosini asrab-avaylash, tinchlik va osoyishtalikning qadriga yetish hamda yurt ravnaqi yo‘lida xizmat qilish har bir fuqaroning muqaddas burchi ekani haqida fikr-mulohazalar bildirildi.

Tadbir ishtirokchilari tomonidan bugungi tinch va osoyishta hayotning qadriga yetish, yosh avlodni vatanparvarlik ruhida tarbiyalash hamda tarixiy xotirani mustahkamlash masalalariga alohida e’tibor qaratildi.

Ushbu ma’rifiy tadbir ishtirokchilarda chuqur taassurot qoldirib, xotira va qadrlashning yuksak insoniy fazilat ekanini yana bir bor eslatdi.