5-Charx Kamolon okrugi deputati XDP a'zosi Mahmudova Donoxon Artikovna tashabbusi bilan okrug hududidagi 2-Charx Kamolon hamda 3-Charx Kamolon mahallalarida aholi salomatligini muhofaza qilish va tibbiy xizmatlardan foydalanish imkoniyatlarini kengaytirishga qaratilgan bepul tibbiy ko‘rik tashkil etildi.

Mazkur tadbir davomida mahalla aholisi tajribali va malakali shifokorlar tomonidan chuqurlashtirilgan tibbiy ko‘rikdan o‘tkazildi. Fuqarolarning qon bosimi, yurak-qon tomir tizimi, umumiy salomatlik holati tekshirilib, zarur tavsiya va yo‘llanmalar berildi. Shuningdek, surunkali kasalliklarning oldini olish, kasalliklarni erta aniqlash hamda sog‘lom turmush tarzini targ‘ib qilish masalalariga alohida e’tibor qaratildi.

Tibbiy ko‘rikni tashkil etishdan asosiy maqsad — aholining, ayniqsa, keksalar, ijtimoiy himoyaga muhtoj fuqarolar hamda xotin-qizlarning salomatligini nazorat qilish, ularga sifatli tibbiy maslahat va amaliy yordam ko‘rsatishdan iborat bo‘ldi.

Tadbir davomida fuqarolar o‘zlarini qiziqtirgan tibbiy masalalar yuzasidan mutaxassislar bilan suhbatlashib, kerakli tavsiyalar oldilar. Mahalla aholisi tomonidan bunday ezgu tashabbus yuqori baholanib, inson salomatligini qadrlash va aholi manfaatlarini ta’minlash yo‘lidagi amaliy ishlar uchun tashakkur bildirildi.

Deputat tomonidan hududlarda aholining muammolarini o‘rganish, ularning ijtimoiy himoyasini kuchaytirish hamda sog‘lom jamiyatni shakllantirish borasidagi ishlar izchil davom ettirilmoqda.

Mazkur tadbir “Fuqarolar sog‘lig‘ini saqlash to‘g‘risida”gi Qonun hamda aholining salomatligini mustahkamlashga qaratilgan davlat dasturlari ijrosi doirasida tashkil etildi.