2026 йил 22 апрель куни Остона шаҳрида бўлиб ўтган Минтақавий экологик саммит (МEС-2026) нафақат Ўзбекистон, балки бутун Марказий Осиё давлатлари учун янги стратегик даврни бошлаб берди. Ўзбекистон Республикаси Президенти Шавкат Мирзиёев саммитдаги нутқида глобал иқлим ўзгариши шароитида минтақамиз олдида турган энг ўткир муаммоларни чуқур таҳлил қилиб, уларни бартараф этиш бўйича жаҳон ҳамжамияти эътиборини тортган бешта устувор ташаббусни илгари сурди.

Давлатимиз раҳбари томонидан белгилаб берилган стратегик йўналишларнинг аҳамияти:

«Яшил» иқтисодиёт ва инвестициявий жозибадорлик: Президентимиз томонидан 2035 йилгача бўлган стратегик мақсадлар доирасида таклиф этилган «Марказий Осиё яшил савдо йўлаги» ва иқлим лойиҳаларининг ягона инвестиция портфелини яратиш ташаббуси минтақамизга хорижий капитал ва замонавий технологияларни жалб этишда муҳим ҳуқуқий ва иқтисодий асос бўлади.

Илмий ёндашув ва рақамлаштириш: Атроф-муҳит ўзгаришларининг Ягона минтақавий атласини ишлаб чиқиш масаласи экологик хавф-хатарларни олдиндан прогноз қилиш ва уларга қарши тизимли чоралар кўриш имконини беради.

Биохилма-хилликни муҳофаза қилиш: «Марказий Осиё Қизил китобини» яратиш ташаббуси минтақамизнинг ноёб табиий меросини асраб қолиш йўлидаги тарихий қадамдир.

Ёшлар ва иқлим дипломатияси: 2027 йилда Ўзбекистонда Бутунжаҳон ёшлар иқлим форумини ўтказиш таклифи — янги авлод вакилларини экологик сиёсатнинг фаол иштирокчисига айлантириш мақсадини кўзлайди.

Биз, депутатлар олдидаги вазифалар:

Ушбу ташаббусларнинг ижросини таъминлаш мақсадида экологик қонунчиликни халқаро стандартлар асосида такомиллаштириш, «яшил» энергетика ва чиқиндиларни қайта ишлаш соҳасидаги давлат дастурлари устидан қатъий парламент назоратини ўрнатиш — фаолиятимизнинг бош мезони бўлиши шарт.

Зеро, Президентимиз таъкидлаганидек, экологик хавфсизлик — бу нафақат табиатни асраш, балки халқимизнинг фаровон келажагини таъминлаш демакдир.

Кабулов Мадет,

Халқ депутатлари Қўнғирот туман кенгаши депутати