Xalq deputatlari Tuproqqal’a tuman Kengashi qoshidagi “Yoshlar maslahat guruhi” ishchi komissiyasining navbatdagi yig‘ilishi o‘tkazildi.

Yig‘ilishda har hafta “Payshanba – yoshlar kuni”ni tashkil etish va o‘tkazish tartibini takomillashtirish yuzasidan ishchi guruh tomonidan bir qator taklif va qo‘shimchalar bildirildi.

Jumladan, yoshlar o‘rtasida sog‘lom turmush tarzini shakllantirish maqsadida ommaviy velomarafon o‘tkazish, markaziy ko‘chalarda rahbarlar, yoshlar, talabalar va tashkilot xodimlari ishtirokida velosayrlar tashkil etish, mahallalarda unutilib borayotgan harakatli o‘yinlarni tiklash kabi tashabbuslar ilgari surildi.

Shuningdek, tumandagi markaziy o‘yingohda “Shijoat va g‘ayrat” harbiy musobaqalarining tuman bosqichini o‘tkazishga ko‘maklashish, “Vatan tayanchi” harakati a’zosi, xalqaro musobaqa g‘olibi Amirxon Xudoyshukurov bilan uchrashuvlar tashkil etish rejalashtirildi.

Mazkur tadbirlarni samarali amalga oshirish uchun tuman hokimligi, sport maktabi, Yoshlar ishlari bo‘limi, mahallalardagi yoshlar yetakchilari, mudofaa ishlari bo‘limi, “Vatanparvar” tashkiloti hamda maktabgacha va maktab ta’limi bo‘limi bilan hamkorlikda ish olib borish belgilandi.