Ko’p qavatli uylar atrofini obodonlashtirish, hududni tozalik va tartib-intizom asosida saqlash, shuningdek chiqindilardan xoli va ekologik barqaror muhitni shakllantirish maqsadida 1-S.Ayniy saylov okrugi deputati, Romitan tuman hokimi U.Barnoyev joyiga chiqqan holda amaliy o’rganish ishlari olib borildi.

O’rganish davomida uylar atrofidagi umumiy sanitar holat, chiqindi to’planish nuqtalari, ularni olib chiqish grafigi hamda aholi uchun yaratilgan infratuzilma imkoniyatlari batafsil ko’zdan kechirildi. Shuningdek, yo’laklar holati, yashil hududlar saqlanishi va obodonlashtirish ishlarining tizimli tashkil etilganligi tahlil qilindi.

Aniqlangan ayrim kamchiliklar yuzasidan mas’ul tashkilot va mutasaddilarga tezkor ravishda bartaraf etish, chiqindilarni o’z vaqtida yig’ib olib chiqishni yo’lga qo’yish, maxsus chiqindi joylarini tartibga keltirish hamda hududda doimiy nazorat tizimini kuchaytirish bo’yicha kerakli tavsiyalar berildi.

Shuningdek, deputat tomonidan aholi bilan muloqot o’tkazilib, har bir fuqaroning mahalla tozaligi va obodligiga befarq bo’lmasligi, chiqindilarni belgilangan joylarga tashlash va atrof-muhitni asrashda faol ishtirok etishi muhim ekanligi ta’kidlandi.

Amaliy o’rganish yakunida ko’p qavatli uylar atrofini bosqichma-bosqich obodonlashtirish, sanitar holatni yaxshilash va ekologik madaniyatni oshirishga qaratilgan aniq chora-tadbirlar rejasi belgilab olindi.