Xalq deputatlari Angor tumani Kengashi 19-Farovon saylov okrugi deputati Mamatmirzayeva Raxima tomonidan Farovon mahallasida amalga oshirilayotgan ichimlik suvi ta’minotini yaxshilashga qaratilgan infratuzilmaviy loyihalar joyiga chiqib o‘rganildi. Mazkur o‘rganish jarayonida Xalq deputatlari Angor tumani Kengashi raisi Qo‘zimurotov Abdisalom Javliyevich hamda Kengash kotibiyati mutaxassisi Xurramov Laziz ham ishtirok etdi. O‘rganish davomida hududda ichimlik suvi quvurlarini tortish, suv qudug‘ini qazish hamda zamonaviy nasos uskunalarini o‘rnatish ishlari olib borilayotgani ko‘zdan kechirildi. Jarayonda maxsus texnikalar, jumladan ekskavator va burg‘ulash uskunalari yordamida yer qazish ishlari amalga oshirilayotgani, quvurlarni yotqizish uchun tayyorgarlik ishlari olib borilayotgani aniqlandi. Shuningdek, hududda suv saqlash uchun mo‘ljallangan suv minorasi hamda nasos tizimlari mavjud bo‘lib, mazkur inshootlar orqali aholini uzluksiz va sifatli ichimlik suvi bilan ta’minlash ko‘zda tutilgan. Deputat tomonidan olib borilayotgan ishlar sifati va muddatlari yuzasidan mutasaddilar bilan joyida muhokamalar o‘tkazilib, aholiga qulay sharoit yaratish, mavjud muammolarni tezkor bartaraf etish bo‘yicha tegishli tavsiyalar berildi. Mazkur o‘rganishlar hududda ichimlik suvi ta’minotini yaxshilash, aholi turmush darajasini oshirishga xizmat qiladi.