Navoiy shahridagi maktabgacha ta’lim muassasasida o‘rganish ishlari olib borildi

Xalq deputatlari Navoiy shahar Kengashi deputati Navro‘zov Erkin Ergashevich tomonidan biriktirilgan ijtimoiy soha obyektlaridagi mavjud holatni o‘rganish maqsadida Navoiy shahar 22-sonli davlat maktabgacha ta’lim muassasasiga tashrif amalga oshirildi.

Tashrif davomida muassasaning faoliyati, tarbiyalanuvchilar uchun yaratilgan shart-sharoitlar, ta’lim-tarbiya jarayonining tashkil etilishi hamda moddiy-texnik bazasi atroflicha ko‘zdan kechirildi. Ayniqsa, bolalar salomatligi va xavfsizligini ta’minlashga qaratilgan sanitariya-gigiyenik holatlarga alohida e’tibor qaratildi.

O‘rganish jarayonida muassasaning tozalik holati, ovqatlanish bloki, guruh xonalari, yotoqxonalar hamda hududdagi obodonlashtirish ishlari tahlil qilindi. Shuningdek, xodimlar tomonidan sanitariya qoidalariga qay darajada rioya etilayotgani ham o‘rganildi.

Aniqlangan holatlar yuzasidan mas’ullarga tegishli tavsiya va ko‘rsatmalar berildi. Xususan, sanitariya-gigiyena talablariga yanada qat’iy rioya qilish, bolalar uchun yaratilgan sharoitlarni yaxshilash va xavfsiz muhitni ta’minlash bo‘yicha aniq vazifalar belgilab berildi.

Ushbu o‘rganish ishlari maktabgacha ta’lim muassasalarida ta’lim sifatini oshirish, bolalar uchun sog‘lom va xavfsiz muhit yaratish hamda tizimli nazoratni kuchaytirishga xizmat qiladi. Kelgusida ham bu kabi o‘rganishlar izchil davom ettirilishi ta’kidlandi.