Mazkur jarayon deputatlik nazoratining muhim yo‘nalishi sifatida, amalga oshirilayotgan loyihalarning samaradorligini oshirishga xizmat qilmoqda.

O‘rganishlar davomida hududlarda hayotga tatbiq etilayotgan loyihalarning bugungi holati, ular orqali yaratilayotgan ish o‘rinlari hamda amalga oshirish jarayonida yuzaga kelayotgan muammolar atroflicha tahlil qilindi. 

Xususan, Pichoqchi mahalla fuqarolar yig‘inida joylashgan “Ayder Maks Fayz” mas’uliyati cheklangan jamiyati faoliyati o‘rganildi.

Mazkur korxona avtomobillarni mayda ta’mirlash xizmatlarini ko‘rsatishga ixtisoslashgan bo‘lib, 2026-yilning yanvar oyidan o‘z faoliyatini boshlagan. Ayni paytda korxonada 3 nafar ishchi doimiy bandlik bilan ta’minlangan.

O‘rganish davomida aniqlanishicha, tadbirkorlik subyekti o‘z faoliyatini 500 million so‘m miqdoridagi o‘z mablag‘lari hisobidan yo‘lga qo‘ygan. Shu bilan birga, xizmat ko‘lamini kengaytirish, qo‘shimcha ish o‘rinlari yaratish va faoliyat samaradorligini oshirish maqsadida 70 million so‘m miqdorida kredit mablag‘lariga ehtiyoj mavjudligi ma’lum bo‘ldi.

Deputatlar tomonidan loyiha doirasida mavjud imkoniyatlar, tadbirkorlikni qo‘llab-quvvatlash mexanizmlari hamda moliyaviy resurslarga kirish masalalari yuzasidan tegishli tavsiyalar berildi. Shuningdek, aniqlangan muammolarni hal etish yuzasidan mutasaddi tashkilotlar bilan hamkorlikni kuchaytirish zarurligi ta’kidlandi.

Ta’kidlash joizki, bu kabi o‘rganishlar hududlarda kichik biznes va xususiy tadbirkorlikni rivojlantirish, yangi ish o‘rinlari yaratish hamda aholi bandligini ta’minlashda muhim ahamiyat kasb etadi. Deputatlik nazorati esa loyihalarning manzilli va samarali amalga oshirilishini ta’minlashda asosiy omillardan biri bo‘lib qolmoqda.