Халқ депутатлари Янгиқўрғон тумани Кенгаши депутати Мирзалиев Хабибулло Авазбекович томонидан сайлов округида жойлашган Дўстлик маҳалласида бўлиб, маҳаллада ёшлар билан ишлаш тизими, хусусан, ёшлар агенти фаолияти атрофлича ўрганилди.

Ўрганиш жараёнида маҳалладаги ёшларни ижтимоий қўллаб-қувватлаш, уларнинг бандлигини таъминлаш, тадбиркорликка жалб этиш ҳамда касб-ҳунарга йўналтириш борасида олиб борилаётган ишларга алоҳида эътибор қаратилди.

Жумладан, ногиронлиги бўлган ёшлар билан ишлаш, уларнинг муаммоларини ўрганиш, ижтимоий ҳаётда фаол иштирокини таъминлаш, муносиб иш ўринларига йўналтириш ҳамда доимий қўллаб-қувватлаш чоралари муҳокама қилинди.

Шунингдек, маҳалладаги ёшларни тадбиркорлик фаолиятига кенг жалб қилиш, уларнинг ташаббусларини қўллаб-қувватлаш, имтиёзли кредитлар ва субсидиялардан самарали фойдаланиш имкониятлари юзасидан амалга оширилаётган ишлар кўриб чиқилди.

Бундан ташқари, “Бир миллион дастурчи” лойиҳаси доирасида ўқув курсларини муваффақиятли тамомлаган ёшлар билан манзилли ишлаш, уларнинг билими ва кўникмаларини амалиётга татбиқ этиш, бандлигини таъминлаш, шунингдек, ўз фаолиятини йўлга қўйиши учун зарур молиявий кўмак механизмларидан фойдаланиш масалалари ҳам ўрганилди.

Ташриф давомида ёшлар билан ишлаш самарадорлигини янада ошириш, уларни ҳар томонлама қўллаб-қувватлаш, айниқса, эҳтиёжманд ва имконияти чекланган ёшларга манзилли ёрдам кўрсатиш юзасидан тегишли таклиф ва тавсиялар билдирилди.