Xalq deputatlari tuman Kengashi deputati Qulliyeva Orzigul hamda Kengash kotibiyati bosh mutaxassisi Xurramov Laziz tomonidan hududdagi qurilish obyektlarida navbatdagi nazorat-tahlil o‘rganish ishlari olib borildi. O‘rganish jarayonida Islom taraqqiyot banki mablag‘lari hisobidan 11-sonli umumta’lim maktabi hududida barpo etilayotgan 240 o‘rinli qo‘shimcha bino qurilishi holati ko‘zdan kechirildi. Hozirgi kunda obyektning birinchi qavati qurilish ishlari yakunlanish arafasida ekani, belgilangan loyiha-smeta hujjatlariga muvofiq ishlar sifat va muddat talablari asosida amalga oshirilayotgani qayd etildi. Nazorat-tahlil davomida deputat qurilish jarayonining sifati, texnik talablarning bajarilishi hamda ishlarning belgilangan reja asosida davom ettirilishi yuzasidan mas’ul vakillarga tegishli tavsiya va ko‘rsatmalar berdi. Shuningdek, mazkur loyiha ta’lim muassasasining o‘quvchi sig‘imini kengaytirish va zamonaviy sharoitlar yaratishga xizmat qilishi deputat tomonidan ta’kidlandi.