Xalq deputatlari Angor tumani Kengashi 18-saylov okrugi deputati Yo‘ldosheva Sevara Abduqahxorovna tomonidan hududdagi ijtimoiy soha obyektlarining holatini o‘rganish va qurilish jarayonlari ustidan deputatlik nazorati amalga oshirildi. Xususan, 23-sonli umumta’lim maktabida olib borilayotgan rekonstruksiya ishlari joyiga chiqib o‘rganildi. Tashrif davomida qurilish-montaj ishlarining sifati, belgilangan loyiha hujjatlariga muvofiqligi hamda ishlarning belgilangan muddatlarda bajarilishi masalalari diqqat markazida bo‘ldi. Deputat tomonidan maktab binosida olib borilayotgan ta’mirlash va yangilash jarayonlarida foydalanilayotgan qurilish materiallarining sifati, hamda o‘quvchilar uchun zamonaviy va xavfsiz ta’lim muhitini yaratish holati alohida nazoratga olindi. Shuningdek, qurilish jarayonida aniqlangan ayrim masalalar yuzasidan mas’ul vakilga tegishli tavsiya va ko‘rsatmalar berilib, ishlarni sifatli va o‘z vaqtida yakunlash, ta’lim muassasasini zamonaviy talablarga javob beradigan darajada foydalanishga topshirish zarurligi ta’kidlab o‘tildi. Mazkur o‘rganish ishlari deputatlik nazorati doirasida davom ettirilib, hududdagi ta’lim muassasalarining sharoitini yaxshilash va sifatli infratuzilma yaratishga xizmat qiladi.