Xalq deputatlari Ishtixon tumani Kengashi deputatlari tomonidan o‘rganilgan holat yana bir bor mahalliy muammolarga befarqlik, mas'uliyatni o‘z zimmasiga olmaslik holatini ko‘rsatdi. Gap shundaki, Saroy qishlog‘idagi 180 ta xonadonning 300 ga yaqin o‘quvchisi har kuni 3 kilometr masofadagi nosoz va tamirtalab yo‘ldan Yug‘ontepa MFY hududidagi 31-maktabga qatnab o‘qishga majbur.

Ayniqsa, yomg‘irli kunlarda yo‘lning ahvoli yomonlashib, bolalar oyoq kiyimlari loy va suvga botgancha, maktabga yetib boradi. Bu ularning salomatligi va sifatli talim olishlariga bevosita salbiy ta’sir ko‘rsatadi.

Aholi esa bu vaziyatda o‘z kuchiga tayanishga majbur bo‘lmoqda. Mahalla ahli birlashib, o‘z hisobidan, hashar yo‘li bilan yo‘lni shag‘allashtirishga harakat qilmoqda. Ammo bu yetarlimi? Yo‘l qurilishi va ta'miri bu fuqarolarning emas, masul idoralarning zimmasidagi mas'uliyat emasmi?

Savol tug‘iladi: nega tegishli tashkilotlar bu masalaga e'tibor qaratmayapti? 300 nafar bolaning ta’lim olish yo‘lida qiynalayotgani mutasaddilarni qiziqtirmaydimi? Axir bu bolalar ertangi kunimiz, kelajagimiz emasmi?

Hurmatli mas’ullar, har bir bola maktabga xavfsiz va qulay yo‘l bilan borishga haqli! Ularning bilim olish huquqi Sizning mas'uliyatingiz ostidadir. Aholi harakat qildi, navbat Sizda!