Yurtimizda jamoat xavfsizligini taʼminlash, aholining tinch va osoyishta hayotini kafolatlash, qonunbuzarliklarning oldini olish hamda fuqarolarda huquqiy madaniyatni yuksaltirish borasida tizimli ishlar olib borilmoqda. Bu jarayonda “Xalq manfaatlariga xizmat qilish” tamoyili asosida mahallalarda xavfsizlikni
taʼminlashga oid mutlaqo yangi yondashuv va mexanizmlardan foydalanmoqda. 

Prezidentimizning PQ-1-sonli qarori ijrosini taʼminlash maqsadida joylarda maxsus shtablar tashkil etilgan bo‘lib, ularning faoliyati parlament huzuridagi ishchi guruh tomonidan o‘rganilmoqda. 

Xususan, Senatning Sud-huquq masalalari va korrupsiyaga qarshi kurashish qo‘mitasi raisi Abdulxakim Eshmuratov boshchiligidagi ishchi guruh Toshkent shahrining Sergeli, Yakkasaroy, Mirobod, Chilonzor va Yunusobod tumanlarida bo‘lib, jinoyatchilik va huquqbuzarliklarning oldini olish, kriminogen vaziyatni barqarorlashtirish bo‘yicha amalga oshirilayotgan ishlar bilan tanishdi. Uchrashuvda xalq deputatlari Mirobod tuman Kengash kotibiyat mudiri, Toshkent shahar prokurori, Mirobod tuman prokurori, tuman Ichki ishlar organlari faoliyatini muvofiqlashtirish boshqarmasi boshlig‘i va mas'ul xodimlar ishtirok etdi.

“Ijtimoiy profilaktika”, “namunali xavfsiz yo‘lak” va “namunali xavfsiz ko‘cha” loyihalarini amalga oshirish yuzasidan masʼullarga aniq ko‘rsatmalar berildi. Ayniqsa, qizil toifaga kiruvchi mahallalar bilan manzilli va tizimli ishlash, yashil toifadagi namunali mahallalar tajribasini ommalashtirish muhimligi taʼkidlandi. 

Shuningdek, mahallalarni to‘liq videokuzatuv tizimi bilan qamrab olish, probatsiya hisobida turuvchi yoki muqaddam sudlangan shaxslarning ijtimoiy muammolarini o‘z vaqtida hal etishga alohida eʼtibor qaratildi. 

Olib borilayotgan ishlar natijasida mahallalarda xavfsizlikni taʼminlash, jinoyatlar sonini kamaytirish va fuqarolar hayotida barqarorlikni taʼminlashga qaratilgan amaliy chora-tadbirlar kuchaytirilmoqda.