Xalq deputatlari tuman Kengashining 2026-yilga mo‘ljallangan ish rejasiga muvofiq O‘zbekiston Xalq demokratik partiyasidan saylangan deputat E.Soliyevga biriktirilgan kotibiyat mudiri J.Sadirov tomonidan tumanning “Markaziy” mahallasi Chirchiq ko‘chasida joylashgan aholi va transport vositalari harakati uchun muhim ahamiyatga ega bo‘lgan ko‘prikning bugungi holati o‘rganildi.

🔵O‘rganish davomida mazkur ko‘prik G‘azalkent shahrining chekka hududida joylashgan Toshga ishlov berish kombinati, qurilish materiallari ishlab chiqaruvchi bir qator korxonalar hamda ushbu hududdagi 6 ta ko‘p qavatli uy-joylarda istiqomat qiluvchi aholini shahar markazi bilan bog‘lab turuvchi muhim infratuzilma obyekti ekani qayd etildi. Ko‘prikdan nafaqat korxona va tashkilotlarga qatnovchi transport vositalari, balki aholi ham muntazam ravishda foydalanib kelmoqda. Shu bois uning texnik jihatdan soz va xavfsiz holatda bo‘lishi hududdagi transport qatnovi hamda aholi uchun qulay sharoit yaratishda muhim ahamiyat kasb etadi.

🔵Joyiga chiqqan holda o‘tkazilgan o‘rganish jarayonida ko‘prikning ayrim beton plitalarida siljishlar yuzaga kelgani, beton-sement qoplamasining ayrim qismlari o‘yilib, yemirilgani aniqlandi. Shuningdek, inshootning umumiy holatida ma’naviy va ekspluatatsion eskirish belgilari kuzatilayotgani, ayrim qismlarini ta’mirlash va texnik holatini yaxshilash zarurligi qayd etildi. Mazkur holat, avvalo, ko‘prikdan harakatlanuvchi avtotransport vositalari uchun noqulayliklar keltirib chiqarishi, inshootning ekspluatatsiya muddati va harakat xavfsizligiga ta’sir ko‘rsatishi mumkinligi ta’kidlandi.

🔵Deputat tomonidan ko‘prikning texnik holatini mutaxassislar ishtirokida batafsil o‘rganish, zarur ta’mirlash ishlarining hajmini belgilash hamda ta’mirlash masalasini mas’ul tashkilotlar bilan birgalikda ko‘rib chiqish bo‘yicha takliflar kiritish belgilandi.