Kambag‘allikni qisqartirish bo‘yicha xatlov ishlari o‘rganildi

Xalq deputatlari Termiz tuman Kengashi deputatlari tomonidan Termiz tumanidagi “Kambag‘allik va bandlik masalalari bilan ishlash” shtabi faoliyati o‘rganildi.

O‘rganish davomida 1-bosqichda tumandagi 1 258 ta oila to‘liq xatlovdan o‘tkazilgani ma’lum bo‘ldi.

Ayni paytda 2-bosqichda 2 182 ta oilani xatlovdan o‘tkazish bo‘yicha 11 kishidan iborat tuman shtabi faoliyat olib bormoqda.

Hududlarda xonadonlar bo‘yicha to‘liq xatlov o‘tkazish uchun so‘rovnomalar tarqatilib, ma’lumotlarni “Onlayn mahalla” tizimiga kiritish ishlari davom ettirilmoqda.

Shuningdek, shtab a’zolari tumandagi 30 ta mahallaga biriktirilib, xonadonlarni o‘rganish, mavjud muammolarni aniqlash hamda oilalarning bandligini ta’minlash va daromadini oshirishga qaratilgan ishlarni muvofiqlashtirib bormoqda.

Deputatlar tomonidan xatlov jarayonining amalda qay darajada tashkil etilgani, ma’lumotlarning haqqoniyligi va aniqlangan muammolar bo‘yicha tegishli choralar ko‘rilishi yuzasidan deputatlik nazorati olib borildi.