Aholiga, xususan, maktabgacha ta’lim tashkilotlarida tarbiyalanayotgan bolalarga qulay, xavfsiz va munosib shart-sharoitlarni yaratish, ijtimoiy soha obyektlarining kuz-qish mavsumini barqaror o‘tkazishini ta’minlash borasidagi deputatlik nazorati izchil davom ettirilmoqda.

Xalq deputatlari Termiz shahar Kengashi kotibiyati mudiri, deputat A.Ashurov, Kengashning 4-“Bo‘ston” saylov okrugi deputati G.Abramatova hamda kotibiyat bosh mutaxassisi A.Temirov tomonidan “Jayxun” mahallasida joylashgan 11-sonli davlat maktabgacha ta’lim tashkilotida nazorat-tahlil tadbiri o‘tkazildi.

O‘rganish davomida DMTTning 2026–2027-yillar kuz-qish mavsumiga tayyorgarlik holati, bino va xonalarning isitilishi, mavjud isitish tizimlarining sozligi, issiqlik ta’minoti, zarur yoqilg‘i va boshqa resurslar bilan ta’minlanganlik darajasi ko‘zdan kechirildi.

Mazkur nazorat-tahlil tadbiri Oliy Majlis Senati tomonidan mahalliy Kengash deputatlari faoliyati uchun belgilangan “Mahalliy Kengash deputati faoliyatining eng muhim 24 ta yo‘nalishi” mezonlari asosida tashkil etildi.

Xususan, 11-band — ijtimoiy soha obyektlarining kuz-qish mavsumiga tayyorgarligi va isitish tizimi holatini o‘rganish yo‘nalishiga alohida e’tibor qaratildi.

Shuningdek, ta’lim tashkilotida bolalar uchun yaratilgan shart-sharoitlar, xonalar harorati, sanitariya-gigiyena holati hamda mavsum davomida yuzaga kelishi mumkin bo‘lgan muammolarning oldini olish bo‘yicha amalga oshirilayotgan ishlar ham tahlil qilindi.

O‘rganish yakunlari bo‘yicha aniqlangan masalalarni bartaraf etish, kuz-qish mavsumini barqaror, xavfsiz va muammosiz o‘tkazish, tarbiyalanuvchilar uchun zarur shart-sharoitlarni ta’minlash yuzasidan tegishli tavsiya va takliflar bildirildi.

Deputatlik nazorati — muammoni aniqlash, uning yechimini izlash va ijrosini ta’minlashga xizmat qiladi.