🏛 Xalq deputatlari Chinoz tumani Kengashiga 21-Sharof Rashidov saylov okrugidan saylangan deputat R.Fozilova tomonidan mahalla xotin-qizlar faoli Asila Abdurashidovaning xotin-qizlar bilan ishlash, ularning muammolarini o‘rganish va hal etish borasida amalga oshirayotgan ishlari samaradorligi o‘rganildi.

🔹 O‘rganish davomida xotin-qizlarni qo‘llab-quvvatlash, ularning ijtimoiy muammolarini hal etish hamda turmush sharoitini yaxshilash borasida bir qator amaliy ishlar amalga oshirilgani qayd etildi. Jumladan, 2 nafar fuqaroga 6 oylik ijara kompensatsiyasi to‘lab berilgan, 2 nafar fuqaroga uy-joyini ta’mirlash uchun amaliy yordam ko‘rsatilgan. Shuningdek, ko‘z jarrohligiga muhtoj bo‘lgan 1 nafar fuqaroga zarur yordam ko‘rsatish choralari ko‘rilgan.

🤝 Mahalladagi oilaviy muhitni sog‘lomlashtirish va xonadonlarda tinchlik-totuvlikni ta’minlash maqsadida 20 ta oilaviy nizo bartaraf etilib, muammoli oilalar bilan individual ishlash yo‘lga qo‘yilgan.

🌿 Bundan tashqari, xotin-qizlarning bo‘sh vaqtini mazmunli tashkil etish, ularning ruhiy va jismoniy hordiq chiqarishlarini ta’minlash maqsadida 10 nafardan ortiq ayolning 3 kunlik dam olish maskaniga — Bo‘stonliq tumaniga borishi tashkil etilgan.

🏡 O‘rganish davomida fuqarolarning xonadonlariga ham borilib, ularning yashash sharoitlari bilan yaqindan tanishildi. Jumladan, Qurbonova Go‘zal Bektemirovnaning xonadoni alohida e’tiborga loyiq ekani qayd etildi. Xonadon egasi o‘z qo‘llari bilan turli xil gultuvaklar yasab, ularda gullarni mehr bilan parvarishlab kelayotgani, hovli va xonadonini obod hamda fayzli saqlayotgani tahsinga sazovor.

O‘rganish yakunida xotin-qizlar bilan ishlash samaradorligini yanada oshirish, mavjud muammolarni o‘z vaqtida aniqlash va ularni hal etish bo‘yicha tegishli tavsiya va takliflar berildi.