Olmazor tumanida rekonstruksiya qilingan 535-sonli davlat maktabgacha ta’lim tashkiloti foydalanishga topshirildi

📍 Olmazor tumani "Mustaqil yurt" mahallasida to‘liq rekonstruksiya qilingan 535-sonli davlat maktabgacha ta’lim tashkilotining tantanali ochilish marosimi bo‘lib o‘tdi. Mazkur tadbirda Olmazor tumani hokimi Kudratilla Tulyaganov, xalq deputatlari Olmazor tumani Kengash raisi Shaxnoza Umarxodjayeva, kotibiyat xodimlari, tegishli tashkilotlar vakillari, mahalla faollari hamda nuroniylar ishtirok etdilar.

🌟 Tadbir davomida rekonstruksiya ishlari natijasida muassasada zamonaviy, xavfsiz va qulay shart-sharoitlar yaratilgani, bolalarning sifatli ta’lim-tarbiya olishi, ularning intellektual va jismoniy rivojlanishini ta’minlash uchun barcha zarur imkoniyatlar yaratilgani alohida ta’kidlandi. Ilk bor 1981-yilda barpo etilgan ushbu muassasa bugungi kunda mutlaqo zamonaviy qiyofa kasb etdi. Yangilangan maskan 420 nafar bolajonni o‘z bag‘riga olish imkoniyatiga ega. Bog‘chada bolalarning xavfsiz va shinam muhitda ta’lim-tarbiya olishi uchun barcha qulayliklar yaratilgan. 

⚡️ So‘zga chiqqanlar tomonidan maktabgacha ta’lim tizimini rivojlantirish, ta’lim muassasalarining moddiy-texnik bazasini mustahkamlash hamda yosh avlodni har tomonlama barkamol etib tarbiyalash davlat siyosatining ustuvor yo‘nalishlaridan biri ekani qayd etildi.

✨ Tadbir yakunida mehmonlar muassasada yaratilgan sharoitlar bilan yaqindan tanishib, ushbu loyiha mahalla aholisi, ayniqsa, jajji tarbiyalanuvchilar va ularning ota-onalari uchun munosib tuhfa bo‘lganini e’tirof etdilar.