Saylawshılardıń mashqalaları unamlı sheshim taptı
Men, 13-“Porlıtaw” saylaw okrugınan Xalıq deputatları Bozataw rayonlıq Keńesi deputatı Kenjegaliy Bisenov usı jıldıń 5 ayı dawamında belgilengen grafik tiykarında óz saylawshılarım aldında ámelge asırǵan jumıslarım boyınsha saylawshılar menen ushırasıwlar ótkerip esabat berip kelmektemen.
Ushırasıwlar dawamında elimizde ámelge asırılıp atırǵan keń kólemli demokratiyalıq reformalar, ásirese, Mámleketimiz basshısı tárepinen Qaraqalpaqstan Respublikasın sociallıq-ekonomikalıq rawajlandırıw, xalıqtıń abadanlıǵın arttırıw, injenerlik-kommunikaciya infrastrukturasın jaqsılaw, jańa jumıs orınların jaratıw jáne sociallıq qorǵaw sistemasın bekkemlewge qaratılǵan Párman hám qararlardıń mazmun-mánisi haqqında keńnen maǵlıwmat berildi.
Sonday-aq, Xalıq deputatları Bozataw rayonlıq Keńesiniń sessiyalarında qabıl etilgen qararlar, olardıń xalıqtıń turmıs dárejesin jaqsılaw, aymaqlardı kompleksli rawajlandırıw hám sociallıq mashqalalardı sheshiwdegi áhmiyeti boyınsha túsindiriw jumısları alıp barıldı.
Ushırasıwda usı jıl ushın qabıl etilgen "Máhállelerdi rawajlandırıw hám jámietti joqarılatıw jılı" Mámleketlik baǵdarlaması sheńberinde belgilengen tiykarǵı wazıypalar, máhálleler infrastrukturasın rawajlandırıw, xalıqtı sociallıq qollap-quwatlaw, bántlikti támiyinlew, isbilermenlikti rawajlandırıw, bilimlendiriw, densawlıqtı saqlaw hám ekologiyalıq turaqlılıqtı támiyinlewge qaratılǵan ilajlar haqqında da tolıq maǵlıwmat berildi.
Esabat dáwiri dawamında saylawshılardan jámi 3 múrájat kelip tústi. Olardıń hár biri úyrenilip, tiyisli mámleketlik hám xojalıq basqarıw uyımları jáne juwapker shólkemler menen birgelikte kórip shıǵıldı. Nátiyjede múrájatlardıń tiykarǵı bólegi unamlı sheshildi, qalǵanları boyınsha ámeliy ilajlar kórilmekte.
Sonıń ishinde, rayon orayınan «Porlıtaw»  asfalt jolınıń qayta ońlanǵanlıǵı,  xalıq ushın áhmiyetli bolǵan mashqalalarǵa sheshim tabıldı. Bul bolsa saylawshılardıń turmıs sapası hám turmıs sharayatın jáne de jaqsılawǵa xızmet etti.
Ushırasıwlar dawamında saylawshılar mámleketimizde ámelge asırılıp atırǵan reformalardı keńnen qollap-quwatlaytuǵının, mámleketimiz tárepinen insan qádirin ulıǵlaw, xalıqtı sociallıq qorǵaw hám aymaqlardı rawajlandırıw baǵdarında ámelge asırılıp atırǵan jumıslar óz turmıslarında ayqın sezilip atırǵanın ayrıqsha atap ótti.
Quwanıshlı tárepi, saylaw okrugim aymaǵındaǵı ishki jollar, túngi jaktılandırıwlar sıyaqlı áhmiyetli mashqalalar basqıshpa-basqısh sheshilmekte. Bul baǵdarda xalıq penen turaqlı pikirlesiw, olardıń pikir-usınısların esapqa alıw deputatlıq jumısımnıń tiykarǵı baǵdarlarınan biri bolıp qalmaqta.
Sonıń menen birge, xalıq deputatları Bozataw rayonlıq Keńesiniń sessiyaları, turaqlı komissiyalar májilisleri hám deputatlıq toparınıń jumısında turaqlı qatnasıp, partiyamız elektoratınıń máplerin qorǵaw, xalıqtı oylandırıp atırǵan sociallıq máselelerdi kóteriw, qabıl etilip atırǵan qararlardıń xalıq máplerine xızmet etiwi boyınsha óz usınıs hám baslamalarımdı alǵa qoyıp kelmektemen. Keleshekte de saylawshılarım menen turaqlı sóylesiw, olardıń mashqala hám usınısların tereń úyreniw, hár bir múrájatqa juwapkershilik penen qatnas jasaw jáne olardıń nızamlı máplerin qorǵaw deputatlıq jumısımnıń tiykarǵı baǵdarı bolıp qaladı.

Kenjeǵaliy Bisenov,
13-“Porlıtaw” saylaw okrugınan Xalıq deputatları
Bozataw rayonlıq Keńesi deputatı