Kitapqumarlıq - millet rawajlanıwı hám ruwxıy rawajlanıwınıń bekkem tiykarı

Prezidentimiz Shavkat Mirziyoev tárepinen Ózbekstanda kitapqumarlıqtı rawajlandırıw boyınsha ulıwma milliy háreketke start berilgeni mámleketimizde insan kapitalına investiciya kirgiziw, jaslardı ruwxıy-ádep-ikramlılıq hám intellektuallıq jaqtan joqarılatıwǵa qaratılǵan mámleketlik siyasattıń izbe-iz dawamı boldı.
Mámleketimiz basshısınıń atap ótkenindey, búgin sanlı texnologiyalar hám jasalma intellekt jedel rawajlanıp atırǵan sharayatta erkin pikirleytuǵın, tallay alatuǵın hám durıs qarar qabıl etiw potencialına iye áwladtı tárbiyalaw hár qashanǵıdan da úlken áhmiyetke iye bolmaqta. Bunıń eń isenimli jolı bolsa kitap oqıw hám kitapqumarlıq mádeniyatın arttırıw bolıp esaplanadı.
"Kitap oqıǵan adam tereń hám salamat pikirleydi. Bunday pikirge iye insan bolsa jámiyetti ózgerte aladı," degen Prezidentimizdiń pikiri búgingi rawajlanıwdıń eń áhmiyetli ólshemin bildiredi. Sebebi bilimli, dúnyaqarası keń hám ruwxıy bárkamal insanlar ǵana jámiyettiń rawajlanıwına múnásip úles qosa aladı.
Elimizde kitapqumarlıqqa mámleketlik siyasat dárejesinde itibar qaratılıp atırǵanı, "Jas kitapqumar", "Jas kitapqumar shańaraq" tańlawları, endi bolsa "Milliy kitapqumarlıq háreketi"niń jolǵa qoyılıp atırǵanı jaslardıń ilimge qızıǵıwshılıǵın jáne de arttırıw, kitaptı turmıs tárizine aylandırıwǵa xızmet etedi. Ásirese, bul hárekettiń pútkil respublika boylap keń kólemli shólkemlestirilgeni hám jeńimpazlar ushın joqarı dárejedegi xoshametlew sistemasınıń engizilgeni kitapqumarlıqtı ǵalabalıq háreketke aylandırıwda úlken áhmiyetke iye.
Prezidentimiz tárepinen bul baslamanıń "tek ǵana kitap oqıw jarısı emes, al mámleket keleshegine qaratılǵan strategiyalıq investiciya" sıpatında bahalanǵanı onıń mazmun-mánisin tolıq ashıp beredi. Sebebi, kitap penen tanıs bolǵan jaslar ilimli, watansúyiwshi, joqarı mánawiyatlı hám intaker insanlar bolıp kamalǵa keledi.
Sonıń ushın bul ulıwma milliy háreketti keńnen qollap-quwatlaw, kitapqumarlıq mádeniyatın hár bir máhálle, hár bir shańaraq hám hár bir bilimlendiriw mákemesinde bekkem engiziw bárshemizdiń áhmiyetli wazıypamız bolıp esaplanadı.
Bul baslama jaslardıń qálbinde ilimge muhabbat, kitapqa húrmet hám jaqsı qádiriyatlarǵa sadıqlıq sezimlerin jáne de bekkemlep, Jańa Ózbekstannıń intellektuallıq hám ruwxıy potencialın arttırıwǵa múnásip úles qosatuǵınına isenemiz. Kitapqumar milletti hesh qanday sınaq jeńe almaydı. Sebebi, ilim-máripat hám joqarı oy-pikir hár qanday rawajlanıwdıń eń bekkem tiykarı bolıp esaplanadı.

Sharibay BERDAXOV,
6-"Andijan" saylaw okrugınan Xalıq deputatları Bozataw rayonlıq Keńesi deputatı, ÓzXDP deputatlıq toparı aǵzası