Muzrabot tumani hokimi, xalq deputatlari tuman Kengashi deputati Abdulla Mamatqulovning tashabbusi bilan Muzrabot tumaniga kirish qismiga “Stela” monumenti qurib bitkazildi.

Mazkur Stela nafaqat tuman ramzi, balki hududning bugungi taraqqiyoti, yangicha qiyofasi va kelajak sari dadil odimlayotganini aks ettiruvchi muhim me’moriy obyekt sifatida qad rostladi.

Tuman hokimi, tuman kengshi deputati Abdulla Mamatqulov monument hududida amalga oshirilgan ishlar bilan tanishdi. O‘rganish davomida “Stela”ning me’moriy ko‘rinishi, bezak elementlari, qurilish sifati hamda atrof hududda olib borilayotgan obodonlashtirish ishlari ko‘zdan kechirildi.

Tuman hokimi tomonidan ushbu maskanni yanada jozibador va qulay hududga aylantirish maqsadida “Stela” atrofida 24/7 rejimida faoliyat yurituvchi savdo shoxobchasi, zamonaviy hojatxona hamda dam olish uchun zarur infratuzilma obyektlarini barpo etish ishlarini jadallashtirish yuzasidan mas’ullarga tegishli topshiriqlar berildi.

Shuningdek, hududda ko‘kalamzorlashtirish ishlarini kengaytirish, manzarali daraxt va gul ko‘chatlari ekish, tungi yoritish tizimlarini zamonaviy talablarga mos ravishda tashkil etish hamda obodonlashtirish ishlarini kompleks tarzda davom ettirish zarurligi ta’kidlandi.

Yangi bunyod etilgan “Stela” monumenti endilikda Muzrabot tumaniga tashrif buyurayotgan mehmonlarni munosib kutib oladigan, tumanning zamonaviy qiyofasi va bunyodkorlik salohiyatini namoyon etadigan ramziy maskanlardan biriga aylandi.