Bugun Navoiy viloyati, Qiziltepa tumanidagi muhtasham “To‘dako‘l” Xalqaro shaxmat maktabida 20 yoshgacha bo‘lgan yoshlar o‘rtasida O‘zbekiston chempionati o‘z ishini boshladi.

Musobaqaning tantanali ochilish marosimida Navoiy viloyati Yoshlar ishlari boshqarmasi boshlig‘i hamda “To‘dako‘l” Xalqaro shaxmat maktabi direktori so‘zga chiqib, musobaqani rasman ochib berdi. Ishtirokchilarga omad tilab, ushbu chempionat kelajak chempionlarini kashf etishda muhim qadam ekanligi ta’kidlandi.

Ma’lumot oʻrnida bahslar o‘g‘il bolalar va qizlar o‘rtasida alohida guruhlarda, aylanma tizimda (11 tur) standart yo‘nalish bo‘yicha o‘tkazilmoqda. Har bir guruhda saralangan 12 nafar kuchli shaxmatchi dona suradi.

G‘oliblar qimmatbaho sovrinlar bilan birga 2026-yilgi O‘zbekiston chempionati (Oliy liga) yo‘llanmasini ham qo‘lga kiritadilar!