Xalq deputatlari Toyloq tumani Kengashi kotibiyati mudiri B.Xamrayev tumandagi “O‘rtaqishloq” mahallasida bo‘lib, aholi tomorqalaridan samarali foydalanish, ichki bozor uchun xaridorgir mahsulotlar yetishtirish hamda oilalarning moddiy farovonligini oshirish borasida olib borilayotgan ishlar bilan tanishdi.

O‘rganishlar davomida mahalladagi bir qator aholi xonadonlariga tashrif buyurilib, tomorqa madaniyati, issiqxonalar faoliyati va ekinlardan yuqori hosil olish tajribalari ko‘zdan kechirildi.

Muhim jihat: Bugungi kunda tomorqa faqatgina ro‘zg‘or ehtiyoji emas, balki oilaviy tadbirkorlikni boshlash va barqaror daromad topish uchun eng qulay imkoniyatdir. Xonadon egalari bilan suhbatda yerdan yilda 2-3 marta hosil olish, zamonaviy agrotexnik tadbirlarni qo‘llash orqali eksportbop va bozorbop mahsulotlar yetishtirishni ko‘paytirish zarurligi alohida ta’kidlandi.

Suhbat va o‘rganishlar davomida tomorqadan samarali foydalanishda qiyinchilikka uchrayotgan xonadonlarga soha mutaxassislari va mahalla faollari tomonidan amaliy ko‘maklashish, ularni zarur urug‘lik hamda o‘g‘itlar bilan ta’minlash tizimini yanada jonlantirish bo‘yicha tegishli tavsiyalar berildi.

Yerdan unumli foydalanib, ham o‘z ro‘zg‘orini but qilayotgan, ham bozorlarimiz to‘kinligiga hissa qo‘shayotgan mehnatkash toyloqliklarning tajribasini ommalashtirish ishlari davom ettirilmoqda.