DEPUTAT NAZORATI: AJRATILGAN KREDITLAR VA AHOLI BANDLIGI O‘RGANILDI

Xalq deputatlari Uzun tuman Kengashi deputati faoliyatining eng muhim yo‘nalishlariga doir 24 ta tavsiya ijrosini ta’minlash hamda "Mahallabay" ishlash tizimi samaradorligini oshirish maqsadida navbatdagi deputatlik nazorati tadbiri o‘tkazildi.

12-Uzun qishloq saylov okrugidan saylangan deputat B.Mirzoyev hamda tuman Kengashi kotibiyati bosh mutaxassisi Sh.Ergasheva “Uzun qishloq” mahalla fuqarolar yig‘inida bo‘lib, hokim yordamchisi Sh.Norbo‘tayev tomonidan aholiga ajratilgan maqsadli imtiyozli kreditlarning samaradorligini o‘rgandi.

O‘rganish davomida quyidagi yo‘nalishlarga asosiy e’tibor qaratildi:

Chorvachilikni rivojlantirish: Fuqarolarga qoramol sotib olish uchun ajratilgan 42 million so‘mlik kredit mablag‘larining maqsadli sarflanishi va xonadonlardagi chorva mollarining parvarishi ko‘zdan kechirildi.

Xotin-qizlar bandligi: "Ayollar daftari" va mahalla xotin-qizlari bandligini ta’minlash maqsadida tikuv mashinalari uchun ajratilgan kreditlar o‘rganildi. Tikuvchilik yo‘nalishida o‘zini o‘zi band qilgan ayollarning ish jarayoni va daromad manbalari bilan tanishildi.

Tomorqadan unumli foydalanish: Mahalladagi issiqxona xo‘jaliklari faoliyati o‘rganildi. Xususan, imtiyozli kredit hisobiga zamonaviy issiqxona qurib, bugungi kunda bozorga sifatli pomidor mahsulotlarini yetkazib berayotgan tadbirkor fuqarolar tajribasi yuqori baholandi.