QONUN USTUVORLIGI - FAOLIYAT SAMARADORLIGINING ASOSI 

Xalq deputatlari Quva tuman Kengashi raisi Z.Ashurov hamda Kengash kotibiyati mudiri R.Nodirovlar tashabbusi bilan tuman Kengashi deputatlari, Kengash huzuridagi ekspert-maslahat guruhi hamda Yoshlar maslahat guruhi vakillari ishtirokida qonun talablarini chuqur
oʻrganishga qaratilgan navbatdagi oʻquv-seminar tashkil etildi. 

Seminar davomida deputatlarning huquqiy bilimini yanada mustahkamlash, amaldagi qonun hujjatlarini toʻgʻri va samarali qoʻllash, shuningdek, ularning deputatlik faoliyatida masʼuliyat va samaradorlikni oshirish masalalariga alohida eʼtibor qaratildi. 

Xususan, Oʻzbekiston Respublikasining 2017-yil 3-yanvardagi “Korrupsiyaga qarshi kurashish toʻgʻrisida”gi OʻRQ-419-son Qonuni hamda 2024-yil 5-iyunda qabul qilingan “Manfaatlar toʻqnashuvi toʻgʻrisida”gi OʻRQ-931-son Qonuni mazmun-mohiyati yoritilib, ularning amaliyotdagi ahamiyati yuzasidan atroflicha tushuntirishlar berildi. 

Seminar yakunida ishtirokchilarga qonun hujjatlarini joylarda samarali tatbiq etish, aholi oʻrtasida huquqiy madaniyatni yuksaltirish va targʻibot ishlarini olib borish, sohalarda uchrayotgan muammolarni aniqlash va bartaraf etish boʻyicha takliflar kiritish yuzasidan topshiriqlar berildi.