Xalq deputatlari Muzrabot tumani Kengashi deputatlari hamda Kengash kotibiyati xodimlari ishtirokida seminar tashkil etildi.

Seminar Oliy Majlis Senati Raisi Tanzila Narbayeva boshchiligidagi ishchi guruhning Surxondaryo viloyatida olib borgan o‘rganishlari yakunlari hamda ular tomonidan mahalliy Kengashlar faoliyatini takomillashtirish yuzasidan belgilab berilgan vazifalar ijrosini ta’minlash maqsadida o‘tkazildi.

Seminarda xalq deputatlari Muzrabot tumani Kengashi raisi S. Nurmahmatov so‘zga chiqib, Kengash faoliyati samaradorligini oshirish, deputatlik nazoratini kuchaytirish, sessiyalarni sifatli tashkil etish, qabul qilinayotgan qarorlar ijrosini monitoring qilish hamda fuqarolar murojaatlari bilan ishlashni yanada takomillashtirish masalalari yuzasidan atroflicha ma’lumot berdi.

Shuningdek, hududiy dasturlarni ishlab chiqish va ularning ijrosini nazorat qilish, mahalliy budjet mablag‘laridan samarali foydalanish, ijtimoiy infratuzilmani rivojlantirish, aholi bandligini ta’minlash va tadbirkorlikni qo‘llab-quvvatlash bo‘yicha deputatlar oldida turgan ustuvor vazifalar muhokama qilindi.

Seminar davomida deputatlik so‘rovlari bilan ishlash, ijro intizomiga qat’iy rioya etish, mahalliy ijro organlari faoliyati ustidan deputatlik nazoratini kuchaytirish, jamoatchilik eshituvlarini samarali tashkil etish hamda fuqarolik jamiyati institutlari bilan hamkorlikni rivojlantirish yuzasidan so‘z yuritildi.

Yakunda deputatlarga 2026-yil uchun tasdiqlangan saylovchilar bilan uchrashuvlar jadvali asosida o‘z saylov okruglarida muntazam uchrashuvlar o‘tkazish, fuqarolar murojaatlarini qonunchilik talablariga muvofiq ko‘rib chiqish, zarur hollarda tegishli mansabdor shaxslarga deputatlik so‘rovlari yuborish hamda deputatlik so‘rovlarining o‘z vaqtida ijro etilishini ta’minlamagan tashkilotlar masalasini xalq deputatlari tuman Kengashi sessiyalarida muhokama qilib borish yuzasidan tavsiyalar berildi.