Deputatlik so‘roviga javob olindi

Xalq deputatlari Termiz tuman Kengashi deputati tomonidan 2026-yil 30-iyun kuni tuman hokimi o‘rinbosari nomiga Gulbahor mahallasi Oydin hayot ko‘chasida elektr ta’minotidagi uzilishlar hamda kuchlanishning pasayishi yuzasidan yuborilgan deputatlik so‘roviga rasmiy javob kelib tushdi.

Javob xatida qayd etilishicha, tuman Elektr ta’minoti mutaxassislari tomonidan hudud joyiga chiqib o‘rganilgan. O‘rganish natijasida Gulbahor mahallasining Oydin hayot ko‘chasi va boshqa ko‘chalarida aholi sonining ortishi hamda elektr energiyasi iste’molining ko‘payishi sababli tarmoqda kuchlanish pasayishi kuzatilayotgani aniqlangan.

Shuningdek, mavjud muammoni bartaraf etish maqsadida transformator punktlarini yangilash, katta quvvatlisiga almashtirish, qo‘shimcha transformator o‘rnatish hamda elektr tarmoqlarini rekonstruksiya qilish ishlari moliyaviy mablag‘lar ajratilishi asosida bosqichma-bosqich amalga oshirilishi, mazkur hudud 2026-yilda Termiz tumani mahallalarida taqsimlash elektr tarmoqlarini yangilash dasturining manzilli ro‘yxatiga kiritilgani ma’lum qilindi.

Mazkur masalaning ijrosi deputatlik nazoratida bo‘lib, belgilangan ishlarning o‘z vaqtida va sifatli bajarilishi yuzasidan monitoring ishlari davom ettiriladi.