Munosabat

30 iyun — Yoshlar kuni munosabati bilan o‘tkazilgan videoselektor yig‘ilishida Prezidentimiz tomonidan yoshlarning bandligini ta’minlash, ularni zamonaviy kasb-hunarlarga o‘qitish va raqobatbardosh mutaxassislar qilib tayyorlashga qaratilgan yangi tashabbuslar ilgari surildi.

Xususan, zamonaviy kasblarni egallash va malakasini oshirish istagida bo‘lgan yoshlarni qo‘llab-quvvatlash maqsadida «kasb vaucheri» tizimi joriy etiladi. Ushbu tizim doirasida har yili 50 ming nafar yoshga foizsiz ssuda asosida moliyaviy ko‘mak ko‘rsatilib, ularning xalqaro talablarga mos kasb va ko‘nikmalarni o‘zlashtirish xarajatlari qoplab beriladi.

Shu bilan birga, ehtiyojmand oilalardagi 85 ming nafar ishsiz yoshning xususiy ta’lim muassasalarida kasb-hunar o‘rganishi uchun bepul vaucherlar taqdim etiladi. Bu orqali yoshlarni mehnat bozorida talab yuqori bo‘lgan mutaxassisliklarga tayyorlash va ularning doimiy ish bilan ta’minlanishiga keng imkoniyat yaratiladi.

Xalq deputatlari Bo‘ston tumani Kengashi deputati B.Soliyeva