Xalq deputatlari Marg‘ilon shahar Kengashi 1-Uvaysiy saylov okrugi deputati Shoiraxon Madaminova tomonidan saylov okrugida O‘zbekiston Respublikasi Prezidentining PQ–406-son qarori, O‘zbekiston Respublikasi Oliy Majlisi Senati Kengashining KQ–35–V-son qarori hamda mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya ijrosi yuzasidan o‘rganish ishlari olib borildi.

O‘rganish davomida mahalladagi xotin-qizlar faoli faoliyati, "Ayollar daftari" bilan ishlash tizimi, ehtiyojmand xotin-qizlarni ijtimoiy qo‘llab-quvvatlash, ularning bandligini ta’minlash, kasb-hunarga yo‘naltirish hamda mavjud muammolarni bartaraf etish borasida amalga oshirilayotgan ishlar atroflicha tahlil qilindi.

Shuningdek, mahallaning ijtimoiy-demografik holati ham o‘rganildi. Hozirgi kunda Uvaysiy mahallasida 4 040 nafar aholi istiqomat qiladi. Mahallada 1 039 ta xonadon va 1 289 ta oila mavjud. Aholining 2 523 nafari ayollarni tashkil etadi.

O‘rganish jarayonida xotin-qizlar faoli faoliyati samaradorligini yanada oshirish, "Ayollar daftari"da ro‘yxatda turgan fuqarolar bilan manzilli ishlashni kuchaytirish, ularning bandligini ta’minlash hamda ijtimoiy himoyaga muhtoj xotin-qizlarni har tomonlama qo‘llab-quvvatlash yuzasidan tegishli tavsiya va takliflar bildirildi.

Shuningdek, "Ayollar daftari"da ro‘yxatda turgan 26 nafar xotin-qiz ishtirokida malakali psixolog tomonidan seminar-trening tashkil etildi. Tadbir davomida ishtirokchilarga ruhiy salomatlikni mustahkamlash, oiladagi sog‘lom muhitni shakllantirish, shaxsiy rivojlanish va hayotiy ko‘nikmalarni oshirish bo‘yicha zarur tavsiya hamda amaliy maslahatlar berildi.

Mazkur o‘rganishlar mahallada xotin-qizlar bilan ishlash tizimini yanada takomillashtirish, ularning ijtimoiy faolligini oshirish hamda davlat tomonidan yaratilayotgan imkoniyatlardan samarali foydalanishni ta'minlashga xizmat qiladi.