Yig‘ilishda O‘zbekiston Respublikasi Prezidenti huzuridagi ijtimoiy himoya masalalari bo‘yicha maslahatchi hamda Ijtimoiy himoya milliy agentligi direktori tomonidan 2026-yil 2-iyun kuni o‘tkazilgan videoselektor yig‘ilishida berilgan topshiriqlar ijrosi muhokama qilindi.

Kun tartibidagi masala yuzasidan Termiz shahar “Inson” ijtimoiy xizmatlar markazi direktori O.Jumayev hamda Termiz shahar Iqtisodiyot va moliya bo‘limi boshlig‘ining birinchi o‘rinbosari G‘.Toshov hisobot berib, shahar hududidagi nogironligi bo‘lgan bolalarning ta’lim olish huquqini ta’minlash, ular uchun qulay va to‘siqsiz ta’lim muhitini yaratish hamda inklyuziv ta’lim tizimini yanada rivojlantirish bo‘yicha amalga oshirilayotgan ishlar haqida ma’lumot berdilar.

Ta’kidlanganidek, umumta’lim maktablarida nogironligi bo‘lgan bolalar uchun to‘siqsiz muhit yaratish, inklyuziv sinflar va korreksion xonalarni belgilangan talablarga moslashtirish, zarur jihozlar bilan ta’minlash hamda mavjud infratuzilmani yaxshilash maqsadida mablag‘ ajratish masalasi ko‘rib chiqildi.

Mazkur taklif O‘zbekiston Respublikasi Prezidentining 2025-yil 30-yanvardagi PF–17-sonli “Aholini ijtimoiy himoya qilish tizimini moliyalashtirish tartib-taomillarini takomillashtirish to‘g‘risida”gi Farmonining 9-bandi “b” kichik bandiga muvofiq “Infratuzilma va ijtimoiy barqarorlik” jamg‘armasi mablag‘lari hisobidan moliyalashtirilishi yuzasidan muhokama etildi.

Muhokamalar davomida deputatlar tomonidan nogironligi bo‘lgan bolalarning sifatli ta’lim olishlari uchun yaratilayotgan sharoitlar, maktablarda inklyuziv ta’limni tashkil etish holati, ajratiladigan mablag‘larning maqsadli va samarali sarflanishi yuzasidan fikr va takliflar bildirildi.

Yig‘ilish yakunida mazkur masalani Xalq deputatlari Termiz shahar Kengashining navbatdagi sessiyasi kun tartibiga kiritish hamda tegishli qaror loyihasini ko‘rib chiqish bo‘yicha qaror qabul qilindi.