🇺🇿 Xalq deputatlari Uchtepa tumani Kengashi kotibiyati mudiri Anvar Usmanov tomonidan 26-mavze “Shirin” mahallasida hudud infratuzilmasi va aholini qiynab kelayotgan muammolarni o‘rganish maqsadida tanqidiy o‘rganish ishlari olib borildi.

🗂 Mazkur o‘rganish Mahalliy Kengash deputati faoliyatining eng muhim 24 ta yo‘nalishi doirasida tashkil etilib, hududdagi mavjud kamchiliklarni aniqlash, ularni bartaraf etish bo‘yicha mas’ullarga tegishli vazifalar belgilashga qaratildi.

🗣 O‘rganish davomida, avvalo, mahallada sanitariya va obodonlashtirish holatiga alohida e’tibor qaratildi. Jumladan, maishiy chiqindilarni o‘z vaqtida olib chiqish, chiqindi maydonlarining sanitariya holati, ko‘p qavatli uylar atrofi tozaligi hamda hududlarda ekologik muhitni yaxshilash masalalari ko‘zdan kechirildi.

🏢 Shuningdek, ko‘p qavatli uylarning ichki yo‘laklari (podezdlari), yerto‘lalari, kirish qismlarining ta’mirtalab holati, yoritish tizimi, hududdagi tungi yoritgichlar faoliyati ham tanqidiy o‘rganildi. Ayrim hududlarda yoritish tizimi talab darajasida emasligi, ayrim yerto‘lalarda tozalik bilan bog‘liq muammolar mavjudligi qayd etildi.

⚽️ Mahalladagi bolalar maydonchalari, sport inshootlari va aholining bo‘sh vaqtini mazmunli o‘tkazish uchun yaratilgan sharoitlar ham o‘rganilib, ayrim bolalar maydonchalaridagi jihozlar eskirgani, ta’mirtalab holga kelgani hamda hududda qurib qolgan daraxtlar mavjudligi aniqlanib, bu borada mas’ul tashkilotlarga tegishli topshiriqlar berildi.

🏫 Bundan tashqari, hududdagi umumta’lim maktablari, kollej va akademik litseylarning sport zallari, mavjud sport anjomlari hamda ularning bugungi holati yuzasidan ham fikr almashildi. Yoshlarni sportga keng jalb qilish, sog‘lom turmush tarzini targ‘ib etish uchun mavjud imkoniyatlardan samarali foydalanish zarurligi ta’kidlandi.

💼 O‘rganish jarayonida mahallaga biriktirilgan boshqaruv servis kompaniyasi rahbarlari, mahalla raisi hamda mutasaddi tashkilot vakillari ishtirok etdi. Aniqlangan muammolar yuzasidan mas’ullarga tegishli ko‘rsatmalar berilib, ularni qisqa muddatlarda bartaraf etish bo‘yicha vazifalar belgilandi.

🔼 Ta’kidlanganidek, bunday o‘rganishlar hududlarda aholi uchun qulay va xavfsiz muhit yaratish, mavjud muammolarni tizimli ravishda hal etish hamda fuqarolarning yashash sharoitlarini yanada yaxshilashga xizmat qiladi.