Aholiga tibbiy xizmat ko‘rsatish sifati va bepul dori vositalari bilan ta’minlash holati o‘rganildi

Mazkur o‘rganishlarda Xalq deputatlari Namangan viloyati Kengashi kotibiyati mudiri T.Gapparov, Xalq deputatlari Namangan shahar Kengashi kotibiyati mudiri N.Ubaydullayev hamda Xalq deputatlari Namangan shahar Kengashi deputati Sh.Sodiqov ishtirok etib, Namangan shahar tibbiyot birlashmasi Ko‘p tarmoqli markaziy poliklinikasi faoliyati joyiga chiqqan holda o‘rganildi.

O‘rganish davomida aholiga o‘z vaqtida va sifatli tibbiy xizmat ko‘rsatish holati, fuqarolar murojaatlarini ko‘rib chiqish samaradorligi, shifokorlar qabuli, tibbiy xizmatlardan foydalanish imkoniyatlari hamda birlamchi tibbiy yordam ko‘rsatish sifati atroflicha tahlil qilindi.

Shuningdek, aholining imtiyozli toifalarini bepul dori vositalari bilan ta’minlash holati, dori vositalarining mavjudligi, ularni fuqarolarga yetkazish tizimi hamda mazkur yo‘nalishda kelib tushayotgan murojaatlar yuzasidan o‘rganishlar olib borildi.

Mas’ullar bilan o‘tkazilgan muhokamalarda tibbiy xizmatlar sifatini yanada oshirish, profilaktika ishlarini kuchaytirish, aholiga qulay va samarali tibbiy xizmat ko‘rsatishni takomillashtirish hamda aniqlangan kamchiliklarni bartaraf etish yuzasidan tegishli tavsiya va topshiriqlar berildi.

Ta’kidlanganidek, o‘rganish yakunlari asosida tayyorlangan tahliliy xulosalar va takliflar xalq deputatlari Namangan shahar Kengashining navbatdagi sessiyasida muhokama qilinadi hamda masalalar ijrosi ustidan deputatlik nazorati o‘rnatiladi.