Termiz shahrida hududlarning sanitariya holatini yaxshilash, ekologik barqarorlikni ta’minlash hamda maishiy chiqindilarni o‘z vaqtida olib chiqish tizimini takomillashtirish borasidagi ishlar deputatlik nazorati ostida davom etmoqda.

Xalq deputatlari Termiz shahar Kengashi raisi, 9-“Abdulla Avloniy” saylov okrugi deputati D.Normuradova hamda Kengash kotibiyati bosh mutaxassisi A.Temirovlar “Abdulla Avloniy” mahallasida bo‘lib, hududdagi sanitariya-obodonlashtirish holati va chiqindilarni boshqarish tizimini o‘rgandilar.

Nazorat-tahlil tadbiri Oliy Majlis Senati tomonidan belgilangan “Mahalliy Kengash deputati faoliyatining eng muhim 24 ta yo‘nalishi” mezonlari asosida tashkil etilib, xususan, 17-band — chiqindilarni o‘z vaqtida olib chiqish holatiga e’tibor qaratildi.

O‘rganish davomida mahalla hududida aholiga qulay sharoit yaratish, chiqindilarning tartibsiz to‘planishi va antisanitariya holatlarining oldini olish maqsadida zamonaviy chiqindi yig‘ish shoxobchasi qurilayotgani ko‘zdan kechirildi.

Qurilish ishlarining sifatli yakunlanishi, shoxobchaning belgilangan muddatda foydalanishga topshirilishi hamda kelgusida chiqindilarni o‘z vaqtida olib chiqish tizimining samarali tashkil etilishi deputatlik nazoratiga olindi.

Obod mahalla — toza muhit, sog‘lom hayot va farovon turmush garovidir!