Xalq deputatlari Nurobod tumani Kengashi deputati N.Murodova mahalla yettiligi bilan hamkorlikda tumandagi Buloqboshi mahallasida istiqomat qiluvchi fuqarolarning murojaatlari asosida o‘rganish ishlarini olib bordi.

✏️O‘rganish jarayonida nogironligi bo‘lgan shaxslarning huquq va manfaatlarini ta’minlash, ularga yaratilayotgan shart-sharoitlar, ijtimoiy himoya, tibbiy xizmat, ta’lim olish, bandlik hamda ijtimoiy infratuzilma obyektlaridan foydalanish imkoniyatlari yuzasidan mavjud holat atroflicha tahlil qilindi.

💬Shuningdek, o‘rganishlar davomida O‘zbekiston Respublikasining 2020-yil 15-oktabrda qabul qilingan “Nogironligi bo‘lgan shaxslarning huquqlari to‘g‘risida”gi O‘RQ-641-son Qonuni mazmun-mohiyati fuqarolar va mahalla faollariga tushuntirildi. Mazkur Qonun nogironligi bo‘lgan shaxslarning huquq va erkinliklarini ta’minlash, ularni kamsitishga yo‘l qo‘ymaslik, jamiyat hayotining barcha sohalarida teng ishtirok etishi uchun zarur shart-sharoitlarni yaratishga qaratilganligi alohida ta’kidlandi.

✅Deputat N.Murodova tomonidan fuqarolarning murojaatlari yuzasidan tegishli mas’ul tashkilotlar vakillari bilan muloqot o‘tkazilib, aniqlangan muammolarni bartaraf etish, nogironligi bo‘lgan shaxslarni har tomonlama qo‘llab-quvvatlash hamda ularning qonuniy manfaatlarini himoya qilish bo‘yicha tegishli tavsiya va takliflar bildirildi.

⚡️O‘rganish yakunida murojaatlarda ko‘tarilgan masalalar nazoratga olinib, ularning ijobiy yechimini ta’minlash yuzasidan tegishli idoralar bilan hamkorlikda amaliy choralar ko‘rish belgilab olindi. Xalq deputatlari Nurobod tumani Kengashi deputatlari tomonidan fuqarolar murojaatlarini o‘rganish va aholining ijtimoiy himoyaga muhtoj qatlamlarini qo‘llab-quvvatlash borasidagi ishlar izchil davom ettirilmoqda.